客服熱線:3610 4901

12.12 - 12.26全店88折
購物滿299可享額外95折優惠*

SBCDEC1212

前Big 4 Auditor 阿樹跳出荒謬的金錢世界

名家書單
發佈日期:11 Sep,2017
前Big 4 Auditor 阿樹跳出荒謬的金錢世界

好多人對會計呢行,第一印象係好忙,但真係好好pay,晉升路線又清晰,有一定吸引力。阿樹抱著後者嘅睇法,選擇加入香港四大會計師事務所(俗稱 big4)。做牛做馬咗4年,經歷瘋狂OT洗禮,見證種種怪人怪事。最後,佢決心跳出苦海,尋找人生意義,追求寫作夢想。對阿樹嚟講,《一個Auditor耗掉8,800小時的故事》是big4生涯嘅終結,但都係文字事業嘅開始。

編:阿樹,未入會計一行之前,你係咪已經好想做big4?

阿樹:Year1個陣,因為聽講做account好悶,所以諗住一定唔會做。喺year2尾要搵工,先認真考慮做account。因為工作穩定,晉升路線清晰,相比起其他工作,係唔錯嘅選擇。再講呀,我份人好摺,唔太同人social,唔想做銀行,咁就考試考牌做account喇!(編按:套用錢鍾書名句,真係「圍在城裏的人想逃出來,城外的人想衝進去」)

編:入行後,有咩光怪陸離嘅現象?

阿樹:我覺得最奇怪係啲人。會計行業入面,好快升到職。可能你22歲入行,做一兩年,就會升做senior。有啲人又真係覺得自己好senior,會開始點新人做嘢。明明只係做咗兩年,想要print嘢,自己撳粒print制就得,都要點啲新人去print同幫你拎。真係估唔到啲職位title對人有咁大影響,都係虛榮心作祟。(編按:返工遇到呢啲人,除咗覺得新人慘,都只係可以食吓花生……)

編:你係咪見盡公司啲勾心鬥角嘅境況呀?

阿樹:勾心鬥角都有啲嘅,不過因為易升職,同輩之間嘅競爭,好少話要踩低你去上位。上司之間就會有多啲擦鞋情況,例如有個「腦細」好鐘意講無聊笑話,所有人都唔知佢噏咩,都總會有啲人笑到好誇張,拍曬手掌咁。有啲準備升經理嘅會睇準時機同老細食飯,再同周圍人吹噓呢件事,全世界都知佢係「被選中」。

編:除咗錢…你覺得返工有咩得著呢?

阿樹:最有用係個會計牌,相關嘅會計知識,因為之後都會用得上。其次係時間管理,因為你會跟唔同project,要分配工作比下屬。除咗要跟本身啲project外,仲成日有突發嘅task,要考量事件嘅複雜性同優次安排,訓練到管理時間嘅能力。

編:會計界成日OT,咁你抱住咩心態加班?

阿樹:我就梗係快啲做完,快啲走人啦,盡量趕喺9至10點返屋企。不過,好多嘢做個時,真係要做到半夜,內心已經爆哂粗口,但無得走可以點,只可以繼續捱。(編按:咦~阿樹面對OT嘅心態好正常好健康喎,現實係殘酷嘅,各位硬食喇……)

編:咁你幾時決定辭職?家人同女朋友有咩睇法?

阿樹:做到第三年,已經覺得好辛苦,唔想再做落去。(編按︰捱到第3年先想quit,都算勁!)開始搵其他account相關嘅工,但唔太順利,於是又留多1年。做咗足足4年,真係好想走。個一刻,覺得唔需要再迫自己搵到工先辭工,唔想迫自己去做啲唔想做嘅事。(編按:見過啲人做足咁多年,就叫足咁多年想辭工,但一封辭職信都未交過…祼辭真係要好大決心。)父母見我成日凌晨先收工,又成日病,太辛苦啦,都勸我早啲辭工。女朋友係喺公司認識,佢比我更早quit,所以好支持我快啲離開。

編:點解會寫《一個Auditor耗掉8,800小時的故事》?

阿樹:喺中學時,已經習慣寫小說同日記。到做auditor,就開咗Facebook page去寫有關工作嘅散文。好好彩,有出版社搵自己出書。當時有諗過寫作方式係點,歸納以前嘅文章?定係其他方法呢?最後採用故事形式,由第一年自己入行咩都唔識,到心灰意冷決心辭工嘅第四年,完完整整咁寫出嚟。(編按:除咗阿樹嘅心路歷程,書中仲有入職攻略同審計術語索引,都幾啱對會計行業有興趣嘅人睇。)

編:寫書嘅時候,有無參考過其他書?平時你睇咩書多?

阿樹:當時睇咗《告訴我,你是怎麼死的》,係一個驗屍官寫返以前工作上遇到唔同嘅case。以故事去表達職場經歷,好好睇,又值得參考,對我寫書嘅形式有一定啟發。(編按:果然識貨,呢本書揭露咗女法醫嘅工作秘聞,勁多精彩故事,例如點樣驗屍、點樣係案發現場搜證,正過睇美劇呀!)平時我睇開奇幻小說,例如衛斯理、天航、九把刀等等。以前一路睇,一路幻想自己可以寫咩人物故仔。

編:未來會有咩計劃呢?

阿樹:間中會做下account兼職,大部分時間會繼續寫文章,圍繞社會題材去寫。而家都多嘢做,但係開心嘅。(編按:以前做account係多嘢做,跳出big 4都係繼續忙,唔同嘅係而家做得開心,呢點最重要。)

作者簡介

阿樹

阿樹曾經 在big 4(四大會計師事務所)工作了四年多,初時以為自己能戴著面具為錢財而活,但經歷過公司中種種光怪陸離的現象後,決定毅然辭去這份旁人夢寐以求的飯碗。正式踏上文字工匠之路,寫下《一個Auditor耗掉8,800小時的故事》,揭露工作背後的辛酸和不公,實現寫作夢想。

https://www.facebook.com/leafastory
相關優惠至2017年09月25日

阿樹讀乜書

最新促銷